امبارح منظمة الغذاء و الدواء الأمريكية ( FDA ) نزلت تنبيه مهم جدا عن مادة البيوتين ( فيتامين ب 7 ) ، المادة دي بتكون موجودة في المكملات الغذائية الخاصة بالشعر و البشرة و بتكون موجودة بتركيزات عالية .
التنبيه ده نزل من سنتين و أعادوا التنبيه تاني امبارح لأهميته .
التحذير بيقول ان مادة البيوتين تتداخل مع بعض التحاليل الطبية المهمة و بالتالي نتيجة التحليل بتكون غلط .
من أهم التحاليل اللي بيتداخل معاها البيوتين ،<< تحليل التروبونين >>
و ده تحليل مهم جدا لمرضى القلب ، بيتعمل لتشخيص النوبات القلبية و بناءا على نتيجة التحليل ده ، بيتم إتخاذ إجراءات طبية مهمة لانقاذ المريض.
فلو افترضنا ان في مريض بياخد بيوتين و عملوله تحليل تروبونين ، هتظهر النتيجة ان مادة التروبونين طبيعية و بناءا عليه هيكون التشخيص خطأ ، و ده ممكن يعرض المريض للخطر و الموت .
و بالفعل تم تسجيل حالة وفاة بسبب التشخيص الخاطئ الناتج عن نتيجة التحليل الخطأ الناتج عن تداخل البيوتين مع التروبونين في عام 2017 .
الإحتياج اليومي للجسم من مادة البيوتين بيكون 0.03 مجم ، وده مش التركيز اللي بنقلق منه و لا بيحصل تداخل بسببه مع التحليل .
القلق من التداخل اللي بيحصل مع التحليل ، بيكون من التركيزات العالية اللي بنلاقيها موجودة في المكملات الغذائية اللي بيصل التركيز فيها ل 20 مجم و 100 مجم ، مع الأخذ في الاعتبار ان المريض ممكن ياخد قرص و اتنين و تلاته في اليو م و بالتالي التركيز في الدم بيكون عالي جدا مما قد يؤدي الى التداخل مع التحليل .
فلازم المريض اللي هيعمل التحليل ، هو أو حد من أهله يذكر ان المريض بياخد بيوتين .
و لازم الطبيب المعالج او طبيبب التحاليل ياخد التاريخ العلاجي للمريض .
و لو نتائج التحاليل مش متوافقة مع الاعراض اللي ظاهرة على المريض يسأله اذا كان بياخد بيوتين أو لأ .
و لحد الآن مفيش معلومات كافية عن امتي المريض يوقف البيوتين قبل التحليل بحيث ميحصلش تداخل بينهم ، هل يوقفه قبل التحليل بساعه ، بساعتين او تلاته ؟ لسه محدش عارف .
ليست هناك تعليقات:
إرسال تعليق