Prediabetes (Borderline Diabetes) مرحلة ما قبل الاصابة بمرض السكر

- عبارة عن ايه الحالة دي ؟
هي حالة فيها المريض بيكون مستوى سكر الدم عنده عالي و لكن لم يصل بعد للارتفاع اللي يخلينا نشخصه كمريض سكر ، و لكن مع الوقت بتقلب لمرض السكر .

- إيه أعراضها ؟
ملهاش أعراض معينة ، ولكن في بعض الحالات بيكون فيه
عطش - تبول بشكل متكرر - إرهاق مستمر - رؤية ضبابية

- مين أكتر ناس عرضه للإصابة بالحالة دي ؟
1- الستات اللي جالهم سكر الحمل
2- الستات اللي عندهم تكيس المبايض
3-الناس اللي بتعاني من السمنة
4- زيادة الكوليستيرول و الدهون الثلاثية
5- قلة النشاط و الحركة ، من الآخر الناس اللي مش بتمارس اي نشاط رياضي
6- لو حد من الأسرة يعاني من مرض السكر
7- لو السن فوق 45 سنة
إذاً الفئات دي من الناس المفروض يتابعوا قياس مستوى سكر الدم بانتظام .

- عشان أقول ان الشخص ده في مرحلة ما قبل السكر بيكون قياس مستوى السكر في الدم كام ؟
سكر صايم بيكون ما بين 100 -- 125
سكر فاطر بيكون ما بين 140 -- 199

- إيه اللي ممكن نعمله عشان نمنع تحول الحالة دي لمرض السكر ، أو نأخر تحولها لمرض السكر لأطول فترة ممكنة ؟
1- اتباع نظام غذائي صحي
المكسرات من ضمن الأغذية اللي عملوا عليها أبحاث و كانت نتايجها حلوة جدا
2- انقاص الوزن
3- ممارسة نشاط رياضي حتى لو كان المشي نص ساعه ، 5 مرات في الاسبوع
4- الإقلاع عن التدخين
5- معالجة ارتفاع الضغط ، و ارتفاع نسبة الدهون
6- استخدام أدوية السكر مثل ( ميتفورمين ) لتقليل مستوى السكر في الدم .